Plantun de Prouvènço

Pèr coumpara dos planto d'encò nostre

Viola suavis & Potamogeton perfoliatus

Vióuleto-(savo)

Viola suavis

Violaceae

Autre noum : Vióuleto-fèro.

Nom en français : Violette suave.

Descripcioun :
Aquesto vióuleto trachis dins li sebisso e lis orle de bos. Coume Viola odorata, fai de fiéu (estouloun) que couron sus lou sòu, si fueio soun quàsi roundouno e sènt qu'embaumo. Se destrìo d'aquesto radiero bonodi sis estipulo larjo emé de franjo que podon faire fin qu'un mm (fotò). Pòu i'agué de bastard emé V. alba, que trachis pulèu dins li blachiero, e V. odorata.

Usanço :
Li fueio se manjon en ensalado o peréu bouta dins la soupo. Dins vòsti pastissarié poudès i'apoundre li flour que soun poulideto. Li vióuleto soun vertuouso contro lis enfecioun e li destourbo respiratiéu. Lis erbouristo se n'en servon pèr sougna tout un fube de malautié.

Port : Erbo
Taio : 10 à 20 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Viola
Famiho : Violaceae

Ordre : Malpighiales

Coulour de la flour : Bluio
Petalo : irreguliero
Ø (o loungour) flour : 12 à 14 mm
Flourido : Printèms Ivèr

Sòu : Ca
Autour basso e auto : 200 à 1200 m
Aparado : Noun
Febrié à abriéu

Liò : Sebisso - Orle de bos - Ribo d'aigo
Estànci : Mesoumediterran à Mountagnard
Couroulougi : Éurasiatico-Sud
Ref. sc. : Viola suavis M.Bieb., 1819 (= Viola odorata subsp. suavis (M.Bieb.) Nyman, 1870 )

Espigo-d'aigo(-perfouliado)

Potamogeton perfoliatus

Potamogetonaceae

Autre noum : Poutamot.

Noms en français : Potamot à feuilles perfoliées, Potamot perfolié.

Descripcioun :
Espigo-d'aigo pulèu raro que trachis dins lis aigo prefoundo (> 1m), bèn luminouso e permanènto. Es uno planto forto d'un bèu vert, gaire o pas ramificado. Li fueio soun fragilo, alterno (aleva souto l'espigo), sènso pecou ("perfouliado"), en cor à la baso, un pau oundado emé de costo que se vèson bèn. Flouris de mai à juliet.

Usanço :
Es uno planto recercado en aquariofilìo.