Li planto de colo
Tre que fai un pau mens caud, l'éuse laisso plaço au roure. Se parlo de l'estànci coulineen. Coumènço devers 400 à 600 m d'auturo e s'accabo fin qu'aperaqui 800 à 1000 m e mai sus lis uba (1200 m pèr Ventour, mai mounto pas tant dins lis aup). Se pòu destria li planto qu'acoumpagnon tipicamen lou roure (coume l'agast, lou sourbié, lou valinié, lou bouis, l'erbo d'uba...) d'aquéli que fan la transicioun emé l'éuse o de l'autro man emé lou fau dins lis endrè mai umide. I'a li planto de planestèu, de rouinas, de pelouso e de baus.
Li planto de basso mountagno
Li faié formon lou gros de l'estànci mountagnié. Aquéu vai aperaqui de 1000 m fin qu'à 1400-1700 m. Mai bas èi pas proun umide e mai aut fai trop fre l'ivèr. Li fau se podon mescla de sapino o èstre remplaça pèr li pin gavot is adré, pèr de pelouso vo li prat de sègo. Se retrobo pas li mèmi planto. Souto li fau troubarés la tatino emé si fru roujo e peréu lou poulit martagoun. Atroubarés bessai li poulit rasin d'ourse dins li relarg à la sousto.
Li planto de mountagno mejano
Li planto d'auto mountagno
Se li planto de mountagno mejano s'atrobon aperaqui entre 1400 m e 2200 m segound li relarg vo que siguen à l'adré vo l'uba, li planto d'auto mountagno soun dessubre 1800 m pèr lou mens (Ventour) e podon mounta fin qu'i nèu eternalo. Aqui i'a pu ges d'aubre, èi lou relarg di pichòti planto e di bèlli flour qu'en pas gaire de tèms dèvon faire la grano. Segur qu'aqui nòstis àvi mountien pas gaire qu'avien de trabai dins li valado, ço que fai que lou plantun èi pas gaire nouma.