Dins li champ, lis ermas, pèr camin

Pèr counèisse e recounèisse li planto d'encò nostre

fotò

Proche dis oustau e dins lis escoumbro

Proche dis oustau, di jas e dins lis escoumbre s'atrobon tout un fube de planto que vesèn de long de l'an sènso toujour bèn saupre de que soun. Li boutanisto parlon de vegetacioun nitroufilo qu'amon l'azote que l'ome vo enca mai li bèsti escampon. Atroubas aqui la mauvo, lou bon-rùbi vo encaro la dindouliero. D'ùni se plaison quouro n'i'a un mouloun d'azote coume lis ourtigo vo l'espargoulo. Es pas toujour de planto forço agradivo mai nòstis àvi sabien n'en tira lou meiour.

fotò

Dins lis ermas, pèr camin

Pèr camin, dins lis erme e en ribo de culturo, i'a proun de meno de planto tras qu'interessanto qu'avèn usanço de vèire sènso toujour bèn li counèisse. Poudès i'acampa un bon pau de vosto cicoureiado o ensalado champanello : la cicourèio, lou barbabou, la cardello, lou mourre-pourcin, l'armentello, lou repounchoun, la rouqueto e bèn d'àutris encaro. I'atroubarés peréu proun d'erbo vertuouso pèr sougna li mamau de la vido, coume l'erbo-de-l'òli-roujo, l'erbo-de-milo-fueio, la sourbeireto, l'erbo-de-la-pisseto, la counsòudo bono peréu pèr la veissello.

fotò

Dins li blad, li culturo

Li blad, lis estoublo, li vigno, lis óuliveto e li culturo de touto merço soun lou relarg d'aquéli planto que ié dison li marrìdis erbo. Pamens dins li culturo, subretout menado en "bioulougico", i'a proun de planto tras qu'interessanto. I'atroubarés d'erbo coumuno que pousson un pau d'en pertout coume la moustardo-fèro, la ravanello, lou ravaniscle, li rouqueto, mai peréu de planto vengudo d'óuriènt emé li blad (arqueoufito) coume la lasseno, la niello, la roubisso, lis anis-pudènt, lou miraiet, lou cauril-sauvage..., e bèn mai.

Dins li prado umido

Dins li pradarié e li pelouso umido vènon de planto de d'amount que lou mitan, souvènti-fès un pau mai fre, i'es favourable. S'atrobon aqui de planto pasturiero coume lou froumentau e lou margai e peréu li tréule e la luserno. Vènon si apoundre tout un fube de planto que podon gaire s'espandi dins li mitan secarous de Prouvènço coume aquelo poulideto jauneto (Blackstonia perfoliata).