En ribo d'aigo

Pèr counèisse e recounèisse li planto d'encò nostre

Li planto proche de ribiero

A-n-aquésti fourèst que s'espandisson proche de ribiero, li scientifi i'an douna lou noum de ripisilvo. S'atrobo eici de planto coumuno d'aquéu relarg coume la piboulo, lou sause vo encaro lou sanguin. Pamens, segound li relarg, se pòu retrouba uno influènci mieterranènco o pulèu dóu centre de l'Éuropo. Pèr eisèmple la verno de mountagno pòu descèndre bas dins li valèio fin qu'en Durènço, ounte s'atrobo l'aubo mai mieterrano.

Li planto de palun e de roubino

Li palun soun lou relarg de la sagno e di fielouso. Se li coundicioun soun bono (mens de 12 g de sau pèr litre), la sagno s'espandis rapidamen bonodi si sagato e pòu alor curbi de gràndi surfàci. En ribo di roubino, e peréu sus li levadoun, crèisson de noumbróusi planto que trobon aqui touto l'aigo necite. En Camargo li roubino soun entre-tengudo pèr la culturo dóu ris e li planto ajudon à manteni li levado. Es un mitan di proun drud pèr lou bestiàri.

Li planto de la sansouiro

La sansouiro èi cuberto de bouissoun d'engano que crèisson sus un terro limounouso, salado que noun sai, subretout l'estiéu. En mai d'acò, l'ivèr aquéli relarg soun en aigo. Pèr lou plantun li coundicioun pèr crèisse soun adounc tihouso. S'atrobo que d'espèci bèn asatado à-n-aquesto envirouno salado e di proun asfissianto, e pèr tout dire n'i'a pas forço. Lis espèci qu'atroubarés eici soun proun carateristico dóu païs camarguen e dounon d'èr à uno soubro de naturo fèro.

Li planto de prado umido

Dins li pradarié e li pelouso umido vènon de planto de d'amount que lou mitan, souvènti-fes un pau mai fre, i'es favourable. S'atrobon aqui de planto pasturiero coume lou froumentau e lou margai e peréu li tréule e la luserno. Vènon si apoundre tout un fube de planto que podon gaire s'espandi dins li mitan secarous de Prouvènço coume aquelo poulideto jauneto (Blackstonia perfoliata).

Li planto d'aigo

I'a de planto d'aigo d'en pertout mounte l'aigo rèsto proun de tèms pèr que poscon planta caviho ; dins li palun, li canau, li ribiero, li laguno, li lono, li mueio, li lau... Lis idroufito, coume dison li scientifi, chanjon seguènt lou relarg, se i'a de courènt o ges, de sau, e se l'aigo rèsto tout de long de l'an o noun. Dins li palun de Camargo formon li grato à canard (subretout li Chara que soun proun raspignous) tras qu'impourtanto pèr lou bestiàri.