Plantun de Prouvènço

Pèr coumpara dos planto d'encò nostre

Bolboschoenus laticarpus & Cycloloma atriplicifolium

Triangle(-di-làrgi-fru)

Bolboschoenus laticarpus

Cyperaceae

Àutri noum : Liandro, Triangle.

Noms en français : Scirpe à fruits larges, Souchet à fruits larges.

Descripcioun :
Aquéu triangle dóu gènre Bolboschoenus (planto nousado emé de lòngui fueio) trachis dins li canau, roubino e li limoun de ribiero. Fai gaire qu'es esta destria dóu triangle-marin en raport emé la formo de la grano qu'es eici mai larjo. Subretout vèn pas dins li relarg mounte i'a de sau au contro dóu marin. Lis espigo soun mai longo eici. Èi pu tihous de faire la diferènci emé Bolboschoenus glaucus ; pèr acò fau regarda la formo de la grano e l'espessour de l'"exocarpus" (pu grando eici). Coumpara emé lou triangle-verdau que ié sèmblo proun.

Usanço :
Se pòu gaubeja pèr la banastarié, mai avèn ges d'entresigne precis. Escriéure au site se n'en sabès mai. Li canard e lis auco manjon si boudougno.

Port : Grando erbo
Taio : 1 à 2 m
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Bolboschoenus
Famiho : Cyperaceae

Ordre : Poales

Coulour de la flour : Brunello
Petalo : ges
Ø (o loungour) enflourejado : 1 à 4 cm
Flourido : Printèms - Estiéu

Sòu : Ca
Autour basso e auto : 0 à 900 m
Aparado : Noun
Mai à setèmbre

Liò : Ribiero - Roubino - Canau
Estànci : Termoumediterran à Mesoumediterran
Couroulougi : Paleousubretroupicalo
Ref. sc. : Bolboschoenus laticarpus Marhold, Hroudová, Duchácek & Zákr

Ciclolomo

Cycloloma atriplicifolium

Amaranthaceae Chenopodiaceae

Nom en français : Cycloloma à feuilles d'arroche.

Descripcioun :
Planto de l'an, forço raro au nostre, que trachis dins la sablo e li duno. La ciclolomo èi proun ramificado emé uno cambo en zigue-zague cuberto de péu en aragno. Li fueio, poupouso, dounon d'èr à-n-aquéli de l'armòu-fèr. Li flour soun en espigo e caduno caup 5 tepalo emé d'alo sóudado que vènon vióuleto.

Usanço :
La ciclolomo nous vèn d'Americo de l'uba. Lis indian Zuni (fotò) e Hopi (Pople Pueblò dóu Nouvèu-Messique) acampon li grano e emé la farino, mesclado à la de gros-blad, n'en fan de bouiaco e de sucrarié cuecho à la vapour.