Plantun de Prouvènço

Pèr coumpara dos planto d'encò nostre

Achnatherum bromoides & Rumex patientia

Achnatherum bromoides

Poaceae Graminaceae

Nom en français : Stipe faux brome.

Descripcioun :
La bauco-grosso trachis en bèlli mato dins lis éusiero e tepiero sus sòu prefouns. La paumo (paniculo) es estrecho, longo e en formo d'espigau. Sus li glumo espèsso se vèson bèn tres nèrvi (fotò), e l'arèsto de la lemma èi proun longo, de 1 à 3 cm. Li fueio soun bèn verdo emé uno ligulo courteto. Se destrìo de la rino, Achnatherum calamagrostis, tambèn, que i'a gaire de péu dins la flour.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 0,6 à 1 m
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Achnatherum
Famiho : Poaceae
Famiho classico : Graminaceae

Ordre : Poales

Coulour de la flour : Jauno
Petalo : ges
Ø (o loungour) enflourejado : 10 à 30 cm
Flourido : Printèms

Sòu : Ca
Autour basso e auto : 0 à 800 m
Aparado : Noun
Mai à jun

Liò : Éusiero - Tepiero seco - Garrigo
Estànci : Mesoumediterran à Mountagnard
Couroulougi : Estenoumediterrano
Ref. sc. : Achnatherum bromoides (L.) P.Beauv.,1812 (= Aristella bromoides (L.) Bertol., 1835 = Stipa bromoides (L.) Dörfl., 1897 )

Paciènci-di-mouine

Rumex patientia

Polygonaceae

Àutri noum : Fueio-aigro, Paciènci.

Noms en français : Oseille-épinard, Patience des moines.

Descripcioun :
La paciènci-di-mouine, o peréu noumado fueio-aigro, s'atrobo pu gaire, alor qu'èro proun cultivado à passa tèms. Trachis en group proche d'oustau o dins d'ùnis ermas. Se recounèis à si gràndi fueio en lanço, en couor à la baso e pounchudo. L'enflourejado èi fournido, pourtado pèr de ramo drecho.

Usanço :
La paciènci es uno planto que s'adoubo en tian o en meleto coume d'espinarc-fèr o sangàri. Pamens fau pas trop n'en manja malodi l'acide óussali. La racino èi vertuouso contro li mau de péu (en emplastre), recouneigudo coume tounico e contro lou quiéu tapa.