Plantun de Prouvènço

Pèr coumpara dos planto d'encò nostre

Sagina glabra & Polygonum aviculare

Sagina glabra

Caryophyllaceae

Nom en français : Sagine glabre.

Descripcioun :
La sagino-liso es uno planto basso renadivo que trachis en mato dins li pelouso e li roucaio de mountagno. Lou noum latin èi pas trop bèn chausi que porto souvènt de péu sus li fueio e la cambo de flour. Es eisa de s'engana emé lis àutri Caryophyllaceae blanco de mountagno. Aregardas que i'ague cinq estile e cinq petalo à ounglet e de fueio primo emé uno souleto costo à la baso de la longo cambo de flour. Lou boursèu èi peréu di cinq partido.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 1 à 2 cm
Fueio : óupousado
Tipe bioulougico : Camefite
Cicle bioulougico : Planto renadivo

Gènre : Sagina
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 5 à 15 mm
Flourido : Estiéu

Sòu : Si
Autour basso e auto : 1200 à 3000 m
Aparado : Noun
Remarco : Planto endemico (Aup e Apenin)
Juilet à setèmbre

Liò : Pelouso - Roucaio - Pisto d'esqui
Estànci : Subaupen à Aupen
Couroulougi : Ouroufito-Sud-Éuropo
Ref. sc. : Sagina glabra (Willd.) Fenzl, 1833

Lengo-de-passeroun

Polygonum aviculare

Polygonaceae

Àutri noum : Tirasso, Tirasseto-de-camin, Sanguino, Erbo-nousado, Trenco-taio.

Noms en français : Renouée des oiseaux, Traînasse.

Descripcioun :
La lengo-de-passeroun es uno planto coumuno que trachis dins li champ, ermas e pelouso. Pòu èstre siegue drecho, siegue pòu rebala, tirassa au sòu. Fai de pichòti flour mistoulino blanco o roso. La taio di fueio èi proun chanjadisso segound li relarg (fotò).

Usanço :
Es uno planto manjadisso, mai coume pèr tóuti li Polygonaceae, caup d'acide óussali e n'en fau pas trop prendre. Ei couneigudo pèr ajuda au caiamen dóu sang, lucha contro l'inflamacioun, lou mau de garganto, lou tussi, la cagagno...