Plantun de Prouvènço

Pèr coumpara dos planto d'encò nostre

Hordeum marinum & Lemna minuta

Estranglo-bèsti

Hordeum marinum

Poaceae Graminaceae

Àutri noum : Estranglo-chivau, Trauco-sa, Sauto-roubin.

Nom en français : Orge marine.

Descripcioun :
L'òrdi-marin èi coumun dins li prado salado gourgado d'aigo en ivèr. Flouris la primo e l'estiéu, la planto es un pau verdalo. Se destrìo de l'estranglo-chivau, proun coumuno d'en pertout, que sis espigueto toumbon un cop maduro. Èi peréu uno planto de l'an au contre de Hordeum secalinum. Verifica peréu que i'ague ges d'auriheto sus la fueio (Hordeum murinum). La subsp. presentado eici, èi marinum (espigueto esterlo de coustat emé de glumo diferènto).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Hordeum
Famiho : Poaceae
Famiho classico : Graminaceae
Tribu : Triticeae
Ordre : Poales

Coulour de la flour : Verdo
Petalo : ges
Ø (o loungour) enflourejado : 2,5 à 4 cm
Flourido : Printèms - Estiéu

Sòu : Na
Autour basso e auto : Pancaro entresigna
Aparado : Noun
Remarco : Planto de coustiero
Mai à avoust

Liò : Prado salado
Estànci : Termoumediterran à Mesoumediterran
Couroulougi : Éurimediterrano
Ref. sc. : Hordeum marinum Huds., 1778

Lentiho-d'aigo(-menudeto)

Lemna minuta

Araceae Lemnaceae

Àutri noum : Lentihoun, Nadoun, Pampaieto, Tirounado.

Nom en français : Lenticule minuscule.

Descripcioun :
La lentiho-d'aigo-menudeto fai de foundo afalido verdo un pau cendrado que floton sus l'aigo de 1 à 3 mm (emé un rapport 1,2 < L/l < 1,8) groupado pèr 2 à 8. Se recouneis subretout, en mai de sa taio tras que pichouneto bonodi sa costo que fai coume uno gibo sus lou dessubre de la foundo. Trachis souvènt de coumpagno emé Azola, pichot féuse d'aigo (fotò).

Usanço :
Li lentiho-d'aigo se manjon à la sartan coume un liume. En Poulougno, fin qu'à la debuto dóu siècle XXen, èron boulido e pièi cuecho emé de burre o de crèmo emé d'iòu.