Plantun de Prouvènço

Pèr coumpara dos planto d'encò nostre

Galeopsis ladanum & Typha domingensis

Cremai

Galeopsis ladanum

Lamiaceae Labiaceae

Autre noum : Ourtigo-roujo.

Nom en français : Galéopsis intermédiaire.

Descripcioun :
Lou cremai trachis dins li culturo e li meissoun. Pamens èi pulèu rare. Se pòu vèire peréu dins li tepiero roucaiouso e sablouso pauro en cauquié. Se recounèis à si flour roso tacado de blanc e se destrìo de Galeopsis angustifolia bonodi si fueio pu larjo e si sepalo peludo que laisson pamens vèire l'epiderme.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 100 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Galeopsis
Famiho : Lamiaceae
Famiho classico : Labiaceae

Ordre : Lamiales

Coulour de la flour : Roso
Petalo : irreguliero
Ø (o loungour) flour : 1,4 à 2 cm
Flourido : Printèms - Estiéu

Sòu : Si (Ca)
Autour basso e auto : 200 à 2600 m
Aparado : Noun
Jun à setèmbre

Liò : Culturo - Meissoun - Tepiero sablouso - Tepiero roucaiouso
Estànci : Subremediterran à Subaupen
Couroulougi : Éurasiatico
Ref. sc. : Galeopsis ladanum L., 1753 (= Galeopsis intermedia Vill. = Galeopsis ladanum subsp. ladanum )

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.