Plantun de Prouvènço

Pèr coumpara dos planto d'encò nostre

Anchusa undulata & Cuscuta scandens

Anchusa undulata

Boraginaceae

Nom en français : Buglosse à feuilles ondulées.

Descripcioun :
Aquesto planto, pulèu raro, douno d'èr à la lengo-de-biòu, mai trachis dins l'an. Se rescountro dins lis ermas riche en azoute. Se n'en destrìo bonodi si flour un pau mai pichoto e d'un blu mai sourne. Li fueio soun peréu oudado.

Usanço :
Couneissèn pas d'usanço pèr aquesto planto, pamens tant se poudrié que siguèsse manjadisso en vertuouso coume sa cousino.

Port : Grando erbo
Taio : 20 à 100 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Anchusa
Famiho : Boraginaceae

Ordre : Ordre pas nouma

Coulour de la flour : Bluio
Petalo : 5
Ø (o loungour) flour : 0,6 à 1 cm
Flourido : Printèms

Sòu : Ca
Autour basso e auto : 0 à 600 m
Aparado : Noun
Abriéu à mai

Liò : Ermas - Tepiero - Camin
Estànci : Mesoumediterran
Couroulougi : Mediterrano-altanlico
Ref. sc. : Anchusa undulata L., 1753

Péu-de-lin(-escaladaire)

Cuscuta scandens

Convolvulaceae

Àutri noum : Péu-de-lin, Péu-de-damo, Barbo-de-mouine, Rasco, Cuscuto.

Noms en français : Cuscute volubile, Cuscute du Bident.

Descripcioun :
Aquéu péu-de-lin trachis pulèu dins li mitan umide. Si tijo soun jauno aranjado e sis enflourejado en grumicelet fan de 8 à 15 mm. Se recounèis peréu que sis estigmate soun en massugueto. Li flour soun blanco o jaunasso. Li boursèu fan de 2,8 à 3,8 mm.

Usanço :
Li péu-de-lin soun pas acampa au nostre. Caupon un glucoside, la cuscutino, qu'ajudo à caga e à secreta la bilo. La cuscuto de Chino, Cuscuta sinensis, èi vertuouso contro li proublèmo de proustato e d'ourmono encò lis ome o li femo. Se chabis en gelulo .