Li Caprifoliaceae, bonodi lis estùdi genetico, aro, rejougnon principalamen tres anciàni famiho de plantun : aquelo di Caprifoliaceae d'avans qu'es aro esclatado (famiho di cabrifueio), li Valerianaceae (famiho dóu pan-couguiéu) e li Dipsacaceae (famiho dóu cardoun-bastard). Soun majamen d'aubret lignous o d'erbo. Li fueio soun óupousado o verticilado, de cop que i'a touto basalo. Li flour soun regroupado, souvènti fes en paumo o en tèsto (D2). Li sepalo soun bèn pichoto (2, D1, 5), e li petalo de la corollo, au noumbre de cinq (aleva quàuqui ex-Dipsacaceae), formon un embut (C2, D1, V1). Pòu i'agué un esperoun. Lou noumbre d'estamino sóudado au tube de la corollo èi chanjadis : cinq pèr li ex-Caprifoliaceae (C1), uno à cinq pèr lis autro. L'óuviero èi toujour dessouto lou calice (3). Lou fru dis ex-Caprifoliaceae es uno "grano" (empouisounanto - C3), alor qu'aquéu dis autro èi se e indeïscènt emé un calice que soubro. Pèr lis ex-Valerianaceae i'a souvènti fes un plumachoun (V2).