La famiho di Plantaginaceae, bonodi lis estùdi genetico, aro, es estado aumentado principalamen d'aquelo di Globulariaceae e de quàuqui gènre d'ex-Scrophulariaceae (Antirrhinum, Digitalis, Linaria e Veronica...) Soun tóuti d'erbo majamen renadivo emé de fueio simplo. Dins l'anciano famiho di Plantaginaceae, li fueio, qu'an de costo paralèlo coume li mounoucoutiledouno, soun quàsi touto basalo (P2). Lis ex-Globulariaceae e li tres proumié gènre cita çai-subre an li fueio alterno (G1), alor que encò de Veronica soun óupousado. Mai se retrobon de rouseto basalo. Li flour, qu'an li petalo sóudado, au mens à la baso, soun reguliero encò Plantago (P1), au contro dis autro qu'an majamen dos labro (G2, Linaria), aleva encò Veronica. Soun basti sus quatre partido (sepalo, petalo-P1) aleva pèr lis ex-Globulariaceae (cinq-G2). Li petalo soun pichoto encò Plantago (P1) au contro dis autro. An tóuti quatre estamino aleva encò Veronica (dos). Lou fru es un boursèu, deïscènt encò Plantago, e que caup forço grano encò Digitalis.