Plantun de Prouvènço

Pèr coumpara dos planto d'encò nostre

Stipa pennata & Cerastium fontanum

Bauco-à-plumet

Stipa pennata

Poaceae Graminaceae

Àutri noum : Péu-de-sant-Jan, Lanceto, Chavus d'ange.

Noms en français : Stipe pennée, Stipe plumeuse.

Descripcioun :
La bauco-à-plumet trachis dins lou cèntre dis Aup sus cauquié dessus 800 m. Es uno planto eisado de recounèisse emé si grand plumet vo péu-de-sant-Jan. Pamens la classificacioun s'es un pau coumplicado e fau espicha de proche li péu de la lemma (qu'èi dessus ço que lis ancian apelavon la lanceto, vèire çai-contro) que dèu agué la ligno dóu mitan (d'esquino) pu longo que li dos d'à coustat : vèire lou dessin çai-contro. En mai d'acò li limbo di fueio an ges de péu, meme dins li rego entro li costo. Coumpara emé lis àutri bauco-à-plumet.

Usanço :
Bessai que lis enfant mandavon li grano pourtado pèr lou plumet coume de pichòti lanço ? Escriéure au site se n'en sabès mai.

Port : Grando erbo
Taio : 25 à 80 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Stipa
Famiho : Poaceae
Famiho classico : Graminaceae

Ordre : Poales

Coulour de la flour : Blanco
Petalo : ges
Ø (o loungour) enflourejado : 28 à 33 cm
Flourido : Printèms - Estiéu

Sòu : Ca
Autour basso e auto : 800 à 2200 m
Aparado : Noun
Mai à setèmbre

Liò : Tepiero
Estànci : Mountagnard à Subaupen
Couroulougi : Éurousiberiano
Ref. sc. : Stipa pennata L., 1753

Ceraiste(-di-font)

Cerastium fontanum

Caryophyllaceae

Nom en français : Céraiste des fontaines.

Descripcioun :
Es uno planto pelouso emé de long entre-nous. Li fueio soun bèn verdo, pulèu larjo e pelouso peréu. Pòu viéure uno annado, dos o mai. Li petalo soun gaire mai long que li sepalo, aquésti soun bourda d'uno membrano que laisso passa lou lume. Coumpara emé lis àutri ceraiste pelous pèr pas s'engana. I'a uno souleto subsp. encò nostre : la subsp. vulgare.

Usanço :
Li jóuini fueio soun manjadisso, mai couneissèn pas d'usanço particuliero au nostre. Lis indian Chirokee emplegavon uno tisano de tijo e racino contro li vèrme.