Plantun de Prouvènço

Pèr coumpara dos planto d'encò nostre

Myosoton aquaticum & Corydalis solida

Esteleto(-d'aigo)

Myosoton aquaticum

Caryophyllaceae

Autre noum : Ceraiste(d'aigo).

Noms en français : Céraiste aquatique, Malaquie.

Descripcioun :
L'estelleto-d'aigo, di proun raro au nostre (subretout en pau long dóu Rose), trachis sus li limas en ribo d'aigo. Douno proun d'èr à un Stellaria emé si petalo di dos partido, pamens se n'en destrìo seguramen que i'a 5 estile e noun pas 3 à la flour (vèire li fotò). La planto èi proun peludo emé de péu glandoulous e li bratèio soun sènso pecou coume li fueio d'en aut.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Myosoton
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 1,5 à 1,8 cm
Flourido : Printems - Estieu

Sòu : Ca
Autour basso e auto : 0 à 1200 m
Aparado : Noun
Jun à setèmbre

Liò : Limas - Ribiero
Estànci : Termoumediterran à Subaupen
Couroulougi : Éurosiberiano
Ref. sc. : Myosoton aquaticum (L.) Moench, 1794 (= Stellaria aquatica (L.) Scop., 1771 = Cerastium aquaticum L., 1753 )

Couridale

Corydalis solida

Papaveraceae

Nom en français : Corydale à bulbe plein.

Descripcioun :
Lou couridale, que ié dison colombina en Itàli, douno d'èr à-n-un fumo-terro renadiéu. Flouris à la debuto de la primo dins li blachiero e faio, au nostre subretout en Prouvènço preaupenco dóu levant. Se recounèis à sis enflourejado roso emé de gràndi bratèio, à si fueio di proun descoupado e peréu à si fru pendoulant e pounchu.

Usanço :
La planto es empouisounanto que caup d'alcalouïdo dangeirous e de bulbocapnino marrido pèr li tarnavello. Pamens bèn dousado, sarrien bon pèr lucha contro la malautié de Parkinson e d'ùni proublèmo de nèrvi.